လူအစစ်လူဖြစ်ဖို့လိုသည်
လက်ငင်းဒိဋ္ဌ စိတ်ချမ်းသာဖို့ အတွက် မနာလိုမှုရှင်းရမည်။ ဝန်တိုခြင်း ကင်းရမည် ဖြစ်ပါသည်။ စိတ်အေးချမ်းမှု ရယူ တရားအားထုတ်မှုဖြောင့်မည်။ ဝိပဿနာတရား အားထုတ်ခြင်းသည် ဗုဒ္ဓဘာသာဝင်တို့၏ အဓိကလုပ်ငန်း ဖြစ်ပါသည်။
“ထိမှုပေါ်တွင်၊ သတိဝင်၊ သိလျှင် ချမ်းသာမည်” ဟု ကျေးဇူးရှင် စွန်းလွန်းဆရာတော်ကြီး မိန့်ကြားခဲ့ သည်မှာ တိုတိုနှင့် ထိမိလှသော တရား ဖြစ်သည်။ သတ္တဝါတိုင်း၊ လူတိုင်း အသက်ရှူ နေကြသည်။ သို့သော်အသက်ရှမှုကို သတိမထားကြ။ ဝင်ချင်သလိုဝင်၊ ထွက်ချင်သလိုထွက် အသက်မသေအောင် လေကို ရှူရှိုက်နေကြသည်။ တိုးလို့ တိုးမှန်းမသိ၊ ထိလို့ ထိမှန်းမသိ၊ “သတိလက်လွတ်၊ ငှက်တောင်ကျွတ်, သဖွယ်ဖြစ်နေသည်။
နေရာတိုင်းမှာ သတိသည် အရေးကြီး၏။ စားသတိ၊ သွားသတိ၊ လာသတိ၊ ထိုင်သတိ၊ ထသတိ စသည်ဖြင့် အသိနှင့် သတိရှိဖို့လိုသည်။ သတိ မရှိလျှင် အသိမရှိနိုင်ပေ။ အသိမရှိလျှင် ကောင်းမှုကုသိုလ်နှင့် ဝေးမည်။
အသက်ရှူတဲ့အခါ နှာသီးဖျားမှ လေဝင် လာသည်။ လေသည် အဝင်ရော အထွက်ပါ နှာသီးဖျားကို ထိသည်။ ထိုသို့ ဝင်လေ ထွက်လေ နှာသီးဖျားကို ထိသည့်အခါ ထိမှန်းသိအောင် သတိဖြင့် စောင့်ကြည့်ရာ၏။ ဝင်လေ ထွက်လေသည် ဝါယောဓာတ် ရုပ်တရား၊ နှာသီးဖျားသည်လည်း ကာယပသာဒ ရုပ်တရား၊ ထိုရုပ်တရား နှစ်ခု၏ ထိတိုက်မှုကို သတိဖြင့်
စောင့်ကြည့်တဲ့ အခါ ထိသည်ဟု သိသည်။ သိတာသည် နာမ်တရား၊ သတိသည်လည်း နာမ်တရား၊ ထိုထိခြင်း သိခြင်းတို့သည် ကြာရှည်စွာ တည်တံ့ ခိုင်မြဲနေသည်မဟုတ်။ ခဏဖြစ်လျက် ခဏပျက်၏။ ရေပွက် ပမာသာဖြစ်၏။
နှာသီးဖျားမှာ ဝင်လေ ထွက်လေ တိုးထိသည့်အခါ သတိဖြင့် စောင့်ကြည့်လျှင် မမြဲခြင်း အနိစ္စ၊ ဆင်းရဲခြင်းဒုက္ခ၊ ငါဖြစ်ချင်သလိုမဖြစ်၊ သူဖြစ်ချင်သလိုဖြစ်၊ မပိုင်ဆိုင်တဲ့ ရုပ်နာမ်တရားတွေပါလား-အနတ္တစသည်ဖြင့် တဖြည်းဖြည်း ဉာဏ်မှာ ထင်လာနိုင်ပါသည်။ ရုပ်နာမ်တရားတို့အပေါ်ဝယ် သတိဝင်မှလည်း သိမြင်ခြင်း ဉာဏ်(ပညာ)ဖြစ်ရာ၏။ သိမှ ချမ်းသာမည်။ မသိလျှင် သို့မဟုတ် အသိမဝင်လျှင် ဒုက္ခနွံဝဲ ဆင်းရဲတွင်းက လွတ်လမ်း မမြင်နိုင်ပေ။ ဝိပဿနာတရား အားထုတ် ခြင်းဖြင့် လူ့ဘဝတန်ဖိုးကို ပိုမိုမြှင့်တင်နိုင်ကြပါစေ။
ဟိန်းထက်စိုး
အောက်ဖော်ပြပါ အေကြာင်းအရာများကိုနှိပ်၍ ဆက်လက် ဖတ်ရှုနိုင်ပါသည် ခင်ဗျာ။🙏🙏🙏
အေရှ့အိမ်ပုံနှိပ်တိုက်၏ မူပိုင် အဖြစ်ထုတ်ေ၀သောစာအုပ်များမှ သုကထာ စာစဥ်အတဲွ (၁) အမှတ် (၁) မှ ကူးယူဖော်ပြထားပါသည်။
အေရှ့အိမ်ပုံနှိပ်တိုက်ထုတ်စာအုပ်များအားဝယ်ယူဖတ်ရှုလိုပါက အမြို့မြို့အနယ်နယ်ရှိ စာအုပ်တိုက်များ (သို့မဟုတ်) အေရှ့အိမ်ုံနှိပ်တိုက်တွင် ဝယ်ယူဖတ်ရှုနိုင်ပါသည်။
Comments
Post a Comment